வரவு எட்டணா செலவு பத்தணா

   "வாப்பா....." துள்ளிக் குதித்துக் கொண்டு வந்த தனது மகளை அள்ளி அணைத்துக் கொண்டான் ரமீஸ். 

      "வாப்பா நான் நேர்சரிக்குப் போகப் போறேன். உம்மா சொன்னாங்க. பாட்டுப் பாடேலும்.... டான்ஸ் ஆடேலும்...." 

கண்களை விரித்து முகம் முழுக்க மகிழ்ச்சியுடன் சொன்ன தன் மகளின் கன்னத்தில் முத்தமிட்டான் அவன்.

  வீட்டுக்குள் வந்தவன் ஒரு கேள்விக்குறியுடன் தன் மனைவி முபீதாவின் முகம் நோக்கினான்.

  "ஏய்... இது மகள ஜனவரிக்கு நேர்சரிக்கு சேர்க்கோணுமே. நான் பெஸ்ட் நேர்சரி ஒன்டு பார்த்துட்டு வந்த"

  " முபீதா மகளுக்கு இப்பதானே மூன்றரை வயசு. அடுத்த வருஷம் சேர்த்தால் போதாதா ?"

” ஆ… நல்ல கத முன் வீட்டு ரிஸ்மாட மகள சேக்கிய. பக்கத்து வீட்டு ராபியாட மகள சேக்கிய. அது மட்டுமல்ல எங்கட தங்கச்சிட மகனையும் சேக்கிய. ரெண்டு வருஷம் நேர்சரில படிச்சோனும் அப்பதான் நல்லம்”

 " எல்லாரும் செய்தன்டு நாங்களும் செய்ய தேவில்ல முபீதா"

 " நீங்க சும்மா இரிங்கோ அது பெஸ்ட் நேர்சரி. அங்க தனி இங்கிலீஷ்ல தான் டீச்சர் பேசிய. அட்மிஷன் இருபதாயிரம். யூனிபார்ம் இரண்டு செட் தச்சோனும் அதுக்கு ஒரு ஐயாயிரம். புக்ஸ் லிஸ்ட் எப்படியும் ஒரு பத்து பன்னிரண்டாயிரம் வரும். அதோட பிள்ளைக்கு புது சப்பாத்து,பேக், எக்ஸ்ட்ரா செலவு எல்லாம் ஜஸ்ட் ஒரு ஐம்பதாயிரம் இருந்தால் போதும்"

 முபீதா மூச்சு விடாமல் சொன்னபோது ரமீஸுக்கு மூச்சு முட்டியது. அவன் தளர்வுடன் சோபாவில் அமர்ந்து கொண்டான். 

 "முபீதா நாங்க தமிழ் மீடியம் தான் புள்ளைய வச்சப் போற. அதுக்கு எதுக்கு இங்கிலீஷ் மீடியம் நேர்சரி. அடுத்தது நீங்க செல்லிய நேர்சரியப் பத்தி பெருசா நல்ல அபிப்ராயம் இல்ல. நாங்க வேற நல்ல நேர்சரி ஒன்டு பார்ப்போம். மூன்று மாசத்துக்கு முந்தி நாலாம் வகுப்பு படிச்சிய மகன வீக்கண்ட் இங்கிலீஷ் கொலேஜ் சேக்கோனும் என்டு ஆடி நின்ட. இருப்பதாயிரத்துக்கு மேல செலவு நான் ஏன்ட கூட்டாளிக்கிட்ட எடுத்த பத்தாயிரத்தையே இன்னும் திருப்பிக் கொடுக்கல்ல. அதுக்குள்ள இன்னொரு பெரிய செலவொன்ட இழுத்துப் போடிய"

  ரமீஸ் கொஞ்சம் காரமாக பேசியதும் முபீதா முகத்தைத் திருப்பிக் கொண்டு போனாள்.

அடுத்த நாள் “முபீதா… முபீதா…” என கூப்பிட்டவாறு வந்தான் ரமீஸ்.

" நான் நல்ல நேர்சரி ஒன்டு பார்த்துட்டு வந்த. அந்தப் பள்ளி கிட்ட இருக்கிற கைரியா தாத்தாட மகள் பேகம் டீச்சர்ட நேர்சரி"

 "நான் நெனச்ச. எங்கட ஊர்ல இருக்கிற மிச்சம் சீப்பான நேர்சரி அதுதான். ஒரு இருப்பது இருபத்தஞ்சு புள்ளைக தான் படிச்சியாம். சீ... அதுல சேர்ததா சீரழிவு தான்"

" முபீதா நான் நேரில போய் பார்த்துட்டு தான் வந்த. அந்த நேர்சரி மிச்சம் நல்லம். நான் ஸ்கூல் டீச்சர்ஸ் மாரோடையும் பேசின. அவங்களும் பேகம் டீச்சர்ட நேர்சரியத்தான் ரெக்கமண்ட் பண்ணிய. முபீதா எங்கட வரவுக்கு தக்க தான் செலவு செய்யோணும். சும்மா பெருசா சல்லி எடுக்குற நேர்சரிதான் நல்லம் என்டு நெனச்ச வேணாம்" 

"போன வருஷம் கொண்சட்டுக்கு ஒரு புள்ளைக்கு முப்பதாயிரம் மட்டு செலவாம். ஏன்ட கூட்டாளி பொடியன் சென்ன. அவன்ட மகன்தான் இளவரசனாம். ஒத்த செருப்ப வெச்சிக்கொண்டு இளவரசி சிண்ட்றெல்லாவை தேடி போறாம். சின்ன பிள்ளைகளுக்கு இது என்ன பொருத்தமான நாடகமா? சீ.. வெட்கக் கேடு"

“வெளிப்பகட்டுக்கு மயங்க வேணாம் முபீதா. பேகம் டீச்சர்ட நேர்சரிக்கு போன நேரம் இந்த வருஷம் கொண்சட்டுக்கு ‘உண்மையின் உயர்வு’என்று ஒரு நாடகத்தை புள்ளைகளுக்கு பழக்கிக் கொண்டிருந்த .எவ்வளவு அருமையாக புள்ளைக செய்தாங்க தெரியுமா? எவ்வளவு மோட்டிவேஷனலான ஒரு விஷயம். நான் மகள பேகம் டீச்சர்ட நேர்சரில தான் சேர்க்கப் போற. டீச்சருக்கு நாங்க எங்களால ஆன ஹெல்ப்ப பண்ணுவோம்”

“மகள்… வாங்க இந்த அப்ளிகேஷனையும் கொடுத்துட்டு நீங்க ஜனவரியில் இருந்து படிச்சப் போற நேர்சரியையும் பார்த்துட்டு வருவோம்”

மகிழ்ச்சியோடு ஓடி வந்த மகளை அழைத்துக்கொண்டு விரைந்து சென்றான் ரமீஸ்.

ஹஸனியா இர்பான்,
தர்கா நகர்.